27 снежня суд у Менску пакараў Генадзя Верацінскага штрафам у 30 базавых велічынь за ўдзел у акцыі супраць інтэграцыі з Расеяй, якая праходзіла 7 снежня .
Верацінскага абвінавацілі ў тым, што ён браў актыўны ўдзел у несанкцыянаванай акцыі і выкрыкваў лозунгі. Сам Генадзь Верацінскі, фатограф і сябра АГП і БАЖ, кажа, што нічога такога не рабіў. А быў на акцыі і здымаў мерапрыемства як журналіст.
Гэта пацвярджаюць калегі, што былі на акцыі. Здымкі Верацінскага пасля былі размешчаныя на многіх інфармацыйных сайтах.
Што праўда, Генадзь не пазначаў сябе на акцыі журналістам. А гэта, нагадаем, са студзеня 2019 года патрабаванне беларускага заканадаўства.
Закон абавязвае журналістаў мець ясна бачны знак прадстаўніка СМІ. Гэта можа быць нарукаўная павязка, бэйдж ці камізэлька, паведамляе инфармацыйная служба БАЖ.
